假如出来“行古惑”，你会给自己起什么名？

今日开个脑洞，假如有一日你捞唔点，要出嚟行古惑，你做嘅第一件事会系咩？

唔系买把刀！

更加唔系搵个大佬做靠山！

而系要帮自己起个「朵」！

帮自己起一个威水嘅朵，只要你响自己个朵，人哋就会觉得有压迫感，先至有人服你！

挞/响朵——主动地将自己嘅身份或地位告知别人，令自己得到尊重，并籍此获得利益上嘅好处、行动上嘅方便。

「挞/响朵」，起源于抗日战争后，华南地区物资短缺，有军人同关员互相勾结从事走私，关员见到国军制服胸章，就会自动放行。

而军人胸章类似于“花朵”，靠胸章而取得特权就被称为“挞/响朵”，“朵”就被引申为身份嘅意思。

后来由于香港黑帮嘅崛起，「挞/响朵」就被广泛用于黑社会场景。

而一个响亮嘅「朵」，又点离得开一个可以震住全场、大杀四方嘅外号！（唔同你真系想出嚟行，自己就叫小明或者阿红咩）

咁香港黑社会改外号，有咩规律？

今日，就等二十年阅片无数，日日追TVB嘅小沅子为你解答啦！

公式一：普通碎料花名

按照日常生活起花名咁，直接叫“裘哥”、“基哥”、“熊少”、“祥叔”等，简直系普通到不能再普通。

仲有啲复杂啲，直接喺个名前面加个“大”或者“细”字，就成为外号。

比如大B、细B

出自《无间道》 林家栋饰演

（佢系黑警，都勉强算系古惑仔啦~）

又比如，大头、细头，就系唔走私毒品，走私奶粉嗰两兄弟咯！

出自《拆局专家》 彭怀安、罗浩铭饰演

仲有大飞（原名徐飞鸿）

出自《古惑仔》 黄秋生饰演

唔系话改呢啲外号唔好，但系真系唔系好够气势咯！

公式二：属性+姓名

一个叫阿成嘅男人卖大麻，可以叫佢大麻成！

出自《铁马战车》 韦家雄饰演

大麻成经常出现喺TVB剧集中，基本上可以同猪肉荣、菠菜莲、卖鱼胜并列TVB四大常驻角色！

一个人有急智，且行事大胆，可以叫“沙胆X”，比如《雷霆扫毒》之中嘅沙胆添。

出自《雷霆扫毒》 欧阳靖饰演

一个人做事丧心病狂，冇乜人性，就可以叫“喪X”，最常见嘅就系丧彪啦。

出嚟行，点会唔喪，所以好多香港影视剧都会有个角色叫喪彪，不过我最中意嘅喪彪，都系《监狱风云》入边啊个。

出自《监狱风云》 黄光亮饰演

呢种系最常见嘅黑社会外号，基本系拣自己最突出最明显嘅特点属性，配上自己名嘅最后一只字！

类似嘅仲有《潜行狙击》嘅爆登（性格火爆，且爆登与爆灯同音）、《古灵精探》嘅大口英（原作冇交代，不过应该系因为口好大咯……）。

公式三：事迹+名

其中最具代表性嘅例子，就系我嘅两大男神——跛Co同爆Seed！

出自《潜行狙击》 黄宗泽饰演

苏星柏嘅英文名叫Michael，一开始出嚟行就叫“威Co”，后来失势又被威利打跛只脚，外号就变成咗谐音嘅“跛Co”。

另外，个人觉得，呢个外号应该都有致敬香港经典电影《跛豪》。

而爆Seed呢个外号来源于薛家强性格冲动，做事不顾后果，曾经同人打交爆樽，加上薛家强嘅姓氏谐音组合而成。

“爆Seed”一词，同时又系香港青少年网民常用嘅潮语之一，解作爆发自身潜能。

出自《机动战士GUNDAM SEED》，主角喺危急关头都会爆发潜藏力量，体内嘅「种子」状物体爆发。

公式四：姓名谐音

呢种外号唔算多见，比较出名就系《潜行狙击》中嘅蜡青，原名杨立青，取其谐音就叫蜡青。

出自《潜行狙击》，欧阳靖饰演

公式五：取一个字变为日常事物

一直唔系好理解呢种外号嘅意义，取角色名中嘅一个字，然后用相关嘅日常事物词作为外号，都好求其咯……

例子包括木蝨

出自《使徒行者》 梁烈唯饰演

原名张木荣，取其中嘅“木”字，取木蝨一词作为花名，同时都反映人物嘅卑微。

挞沙——

出自《使徒行者》 彭怀安饰演

挞沙本身系一种鱼嘅名（又名比目鱼、左口鱼），角色原名就叫游达富，“游”字又与水有关。

不过个人猜测，呢个名可能系挞Q同缩沙嘅合成，毕竟挞沙哥七集半就直接去攞饭盒啦！

类似嘅仲有《古惑仔》嘅山鸡（原名赵山河）、《学警狙击》嘅左轮（原名费永伦）、田七（原名黄福田）。

公式六：顺口俗语

仲有一种黑社会，系用日常俗语作为自己外号，或者系因为读得顺口，又容易记。

比如挞Q

出自《潜行狙击》 林敬刚饰演

挞Q原本系桌球用语，后引申到其他方面，意指某些事情喺水到渠成之际，因失误而功败垂成。角色原名就叫张达桥，取其谐音就系挞Q啦。

又比如符碌

出自《潜行狙击》 戴耀明饰演

符碌一词来源于英式桌球术语“Fluke”，指侥幸将桌球打入袋口，后来大众就习惯用「符碌」去表达靠运气而侥幸取得成功嘅意思，都几贴合角色性格。

类似嘅仲有《古惑仔》中嘅大天二、巢皮等。

公式七：九唔搭八系列

有啲外号，唔单止睇唔明，仲搵唔到相关解释，不过就系因为咁九唔搭八，唔知讲乜，所以更加令人不明觉厉！

比如猜Fing

出自《使徒行者》 林伟饰演

又比如辣姜

出自《潜行狙击》 黄智贤饰演

知道上面外号意思嘅自己友，麻烦科普下~！

当然啦，如果你个名够特别，就直接用啦，好似欢喜哥同Laughling哥咁！

出自《潜行狙击》 许绍雄饰演

出自《学警狙击》《潜行狙击》 谢天华饰演

以上七条公式，总有一条帮到你！

唔知你又谂好改咩名未？等我哋班马一齐捞大茶饭！

P.S 以上仅供娱乐，大家都系社会主义接班人，要拣条正路行，千祈唔好行差踏错！

素材出自维基百科、香港网络大典等

羊城网负责整理编辑